3 kleng Geschichtercher an engem Sammelband vum Georges Schmitt
De Georges Schmitt (Matbegrënner vum Comité Alstad) huet an sénger laanger Carrière och Prosa op Lëtzebuergesch geschriwwen. Hien ass bekannt fir seng reimend Erzielungen vu Soen a Legenden, déi op Radio Lëtzebuerg iwwerdroe goufen. 1957 gouf den Text vum Radiospill „De Klés’che paakt“, dat vum Pe’l Schlechter illustréiert gouf, am Lëtzebuerger Land publizéiert.
„D’Spill vum Hellegen Niklos“ gouf opgefouert um Radio de 4. Dezember 1937. Dat Legendespill, geschriwwen a selwer illustréiert vum Georges Schmitt, koum 1944 am Uelzecht-Verlag, Letzebuerg eraus a gouf beim Bourg-Bourger gedréckt.
An dësem Wierk greift hien deen aale Legendestoff vum gewësselose Metzler op, deen déi dräi Bouwen ëmbréngt an déi dann vum Hellegen Niklos erëm zum Liewen operwächt gin. Hie léisst dobäi déi ganz Geschicht op eng gudd gelongen Art a Weis um Fëschmaart geschéien. Seng Versen op Lëtzebuergesch sin nët nëmmen e Genoß fir d’Ouer mee och fir d’Aan.
« D’Séche vun de Ko‘ a vun der Méck » mat Biller vum Émile Probst, ass eng Geschicht vum Hésprenger an de Goldkierwerleken, déi och nom 2. Weltkrich erauskoum.
„Aus dem Liewen vum Zent Märten“ ass e weidert Buch, dat 1945 am Uelzecht-Verlag erauskoum – Text vum Georges Schmitt, Biller vum Emile Probst — an dat zum Bénéfice vum Zënt Märtes-Wierk verkaaft gouf.
Wat iwwert d’Reesen an den Openthalt vum hellege Märten bei ons hei bekannt wor, dat huet de Georges Schmitt op Lëtzeburgesch, mat Versen a Reimen niddergeschriwwen. Gewëss et ass net jidderengem séng Saach, esou eppes ze riskéieren : Kapitelen aus der Hellegelegend an aus der Kiirchegeschicht op Lëtzeburgesch ze schreiwen ! Nu gudd, den Dichter, deen ons 1944 d’Séchen vum Zinniklos an 1937 d’Spill vum hellegen Niklos geschenkt huet, hat domat bewise wat een an onser Sprooch leeschte kann. Hien huet sech am Märtesbuch genee un d’Legendentraditioun gehaalen. Dobäi huet den Emile Probst aacht Biller gemoolt. Et muss een sech e wéineg an déi Biller eraliewen, se zerguddst studéieren, fir ze gesin, wéi gudd se geplangt a wéi geschéckerlech se opgebaut an duerchkomponéiert sin. An dat trotz den einfache Mëttelen mat deenen den Artist geschafft huet : dräi Faarwen, einfach Linnen a grouß Flächen.
D‘Texter hu mir esou gelooss, wéi de Georges Schmitt se geschriwwen huet. Op deene leschte Säite vun all Geschicht fënnt de Lieser awer och den Text an der offizieller Lëtzebuerger Schreifweis. E grousse Merci zu gudder Läscht un de Robert Baddé, deen ons déi dräi Geschichtercher an d‘häitegt Lëtzebuergesch gesaat huet an un onse Member Serge di Paoli, deen e flotte Layout fir dës Rééditioun réaliséiert huet.
De Sammelband mat denen 3 Geschichtercher huet d’ Format 165 x 205 mm an huet 85 Säiten. Bestelle kann een de Sammelband vun elo un beim Comité Alstad, duerch Iwwerweise vu 23,00 € pro Sammelband op ons Kont:
bei der Spuerkees: IBAN LU64 0019 1755 0897 0000
(mam Vermierk: Sammelband Schmitt)
Är Bestellung kënnt dann nach virun de Feierdeeg um Postwee bäi Iech heem.
Mir wënschen Iech vill Freed mat dësen 3 Geschichtercher, a vläicht liest d’Mamm, de Papp, oder d’Groussmamm an de Grouspapp hiere Kanner an Enkelkanner dës flott lëtzebuergesch Geschichtercher während de Feierdeeg vum Joeresenn viir.
